Pobreziaren eta Gizarte Bazterkeriaren aurkako Europako Sarea (Anti Poverty Network – EAPN) Europar Batasuneko kide diren estatuetan pobreziaren eta gizarte-bazterketaren aurka diharduten GKEen eta beste talde batzuen koalizio independentea da. Koalizio hori 1990eko abenduan sortu zuten Europar Batasunaren barruan pobrezia- eta bazterkeria-egoeran bizi diren pertsonekin lan egiten zuten erakundeek, eta Europako Kontseiluaren kontsulta-organo bihurtu zen. Era berean, EAPN Gizarte Ekintzarako Europako Plataformaren bazkide sortzailea da.
EAPNk pobrezia eta gizarte-bazterketa desagerrarazteko konpromisoa hartu du, pobrezia eta gizarte-bazterketa pairatzen duten pertsonei beren eskubideak eta betebeharrak baliatzeko aukera ematea bilatzen du, baita isolamendua eta egoera haustea ere, eta bi gai horiek Europar Batasuneko eztabaida politikoen erdigunean jartzea du helburu nagusi. EAPN Europak Bruselan du egoitza
Espainian, Espainiako Estatuan Pobreziaren eta Gizarte Bazterkeriaren aurka Borrokatzeko Europako Sarea (EAPN-ES) 1991n sortu zen, eta 2004an bateratu zen, pobrezia eta gizarte-bazterketa jasaten duten pertsonak gizarteratzeko konpromisoa duten GKEen sare gisa. Gaur egun, 18 sare autonomikok osatzen dute. Sare horien barruan askotariko erakundeak aurki daitezke, hala nola fundazioak, federazioak, tokiko elkarteak eta autonomia- eta toki-mailako GKEak. Horrez gain, estatu mailako 15 erakunde daude, irabazi-asmorik gabekoak eta osagai komuna dutenak: pobreziaren eta gizarte-bazterkeriaren aurkako borroka.
Eapn Euskadi 1997an eratu zen ofizialki (hasieran Bizkaiko EAPN gisa eta 2004tik aurrera Euskadiko EAPN gisa), Pobreziaren eta Gizarte Bazterkeriaren aurkako Borrokan inplikatutako Hirugarren Sektoreko erakundeak elkartzeko helburuarekin.
Gaur egun, Euskal Autonomia Erkidegoko hainbat erakundek osatzen dute. Bazterketa-egoeran dauden hainbat pertsona-talderekin lan egiten dute (langabeak, atzerritarrak, etxerik gabekoak, droga-mendetasuneko arazoak dituztenak, gizarte- eta familia-desegituraketa dutenak, gutxiengoak…), sarean lan egiteko prest daude, koordinatzeko, esperientziak trukatzeko, kideak kualifikatzeko, proiektu komunak egiteko eta elkarrizketarako gaitasuna duen presio-talde bat eratzeko, pobrezia- eta bazterketa-egoerei buruzko informazioa eman eta salatzeko, eztabaida soziopolitikoa bultzatzeko eta egoera horiek gainditzeko baliozko alternatibak aurkezteko.